عندما يرد لفظ بكارة الفتاه بيننا فان الجميع ينصرف نظره وفكره الى شىء واحد وهو ان الفتاه لازالت تحتفظ بعذريتها وفقط
فهل اذا طرحت عليك نفس السؤال وهو مامفهوم المراه البكر فى نظرك ؟
فهل سيكون ردك مقتصر على هذه النظره وفقط ؟
سؤال ورد بينى وبين صديقى كريم واحنا بنتكلم عن السلوكيات اللى احنا بنعايشها دلوقتى فى زماننا هذا
لقيتنى برضه برد بنفس الرد المنطقى اللى الكل عارفه وذكرت حديث الرسول صلى الله عليه وسلم مع أحد الصحابه -لا أذكر من هو _وقد تزوج ثيبا -أى امراه سبق لها الزواج- فقال له هلا تزوجت بكرا تداعبها وتداعبك أو كما قال صلى الله عليه وسلم
ودار الحديث بيننا فى شرح معانى نصيحة الرسول صلى الله عليه وسلم
أنا كنت فاهم ان قصد النبى هنا هو الفتاة البكر أى التى لم يسبق لها الزواج وفقط ولكن كريم شد انتباهى الى نقطه فى غايه الاهميه
وهى انه قال ان النبى صلى الله عليه وسلم كان يقصد البكاره بمعناها الأشمل والأعم وهى مش بس العذريه وانما البكاره الاخلاقيه أيضا
عجبتنى الكلمه أوى من كريم وعجبنى فهمه لكلام النبى صلى الله عليه وسلم بالطريقه دى وقلت اللهم صل وسلم وزد وبارك على سيدنا محمد الذى لاينطق عن الهوى والذى علم بوحى الله من الامور التى تحدث الان منذ ذاك الزمن البعيد
واستفضنا فى الحديث وبدأنا نربط الكلمه - البكاره الاخلاقيه يعنى- باللى بيحصل دلوقتى
فلو حضرتك اتاملت ونظرت حواليك دلوقتى هتلاقى انه فيه فتيات عارفه كل حاجه عن فحولة الرجل وامكاناته والتفاوت بين الرجال فى الامور الزوجيه دى -وانا مش بدعو هنا الى الجهل لان المعرفه ببعض الأمور لها اثارها الجيده على علاقه الازواج - بس أنا قصدى التوقيت والكيفيه والمصدر
النقطه التانيه انه فيه نسبه من الفتيات الأبكار اللى بتمشى فى طريق الحرام وبرضه بتحتفظ بعذريتها ومش حابب انى أذكر الطرق دى هنا وأظن انها مفهومه عند البعض منا
وتتطرق بينا الحديث لمناقشة أمور كتيره منها رتق الغشاء عند الاطباء وزواج الفتيات من دون أى مشكله أو ملاحظه
أنا لقيت ان مفهوم البكاره الاخلاقيه ده أهم فى زماننا ده من البكاره بمفهومها العادى واللى ممكن يتفهم من السطر السابق
أنا بقول ان خطورة الانفتاح الزايد عن اللزوم ده والجرأة او ممكن تقول التجرؤ من جانب الفتيات له خطورته على الحياة الزوجيه فيما بعد
ده مجرد رايى الشخصى انها مش هتكون راضيه عن زوجها باى حال من الاحوال لمقارنتها بحاجات فى دماغها هى غير الحقيقه ومن هنا تيجى الانحرافات الزوجيه والمشاكل والطلاق
احب اعرف رايكم فى الموضوع ده
وأنا شايف ان الموضوع ده والله من الاهمية بمكان بس فى نفس الوقت خايف أكون عديت خط أحمر فى الكتابه واختيار الموضوعات
وفى النهايه ندعى ربنا انه يغنينا جميعا بحلاله عن حرامه انه ولى ذلك والقادر عليه
واسف مره أخرى على الاطاله